🔴 ਕੋਟ ਸਦੀਕ ਵਿੱਚ ਨਜਾਇਜ਼ ਕਲੋਨੀ ਦਾ ਕਾਲਾ ਖੇਡ ਬੇਨਕਾਬ – ਨਹਿਰ ਤੋਂ ਅੰਬੇਡਕਰ ਨਗਰ ਰਸਤੇ ’ਤੇ ਸ਼ਰੇਆਮ ਬਿਲਡਿੰਗ ਕਾਨੂੰਨਾਂ ਦੀ ਉਡਾਈ ਧੱਜੀਆਂ

🟥 Time TV Punjab : ਜਲੰਧਰ ਦੇ ਕੋਟ ਸਦੀਕ ਇਲਾਕੇ ਵਿੱਚ ਨਹਿਰ ਤੋਂ ਅੰਬੇਡਕਰ ਨਗਰ ਵੱਲ ਜਾਣ ਵਾਲੇ ਮੁੱਖ ਰਸਤੇ ’ਤੇ ਨਜਾਇਜ਼ ਕਲੋਨੀ ਕੱਟਣ ਦਾ ਵੱਡਾ ਗੈਰਕਾਨੂੰਨੀ ਖੇਡ ਸਾਹਮਣੇ ਆਇਆ ਹੈ, ਜਿੱਥੇ ਬਿਨਾਂ ਕਿਸੇ ਮਨਜ਼ੂਰੀ ਤੋਂ ਸ਼ਰੇਆਮ ਕਲੋਨੀ ਦੀ ਕੱਟਾਈ ਕਰਕੇ ਨਿਯਮਾਂ ਨੂੰ ਠੇਂਗਾ ਦਿਖਾਇਆ ਜਾ ਰਿਹਾ ਹੈ। ਮੌਕੇ ’ਤੇ ਨਜਾਇਜ਼ ਤਰੀਕੇ ਨਾਲ ਸੜਕਾਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ ਅਤੇ ਬਿਲਡਿੰਗ ਬਾਇਲੋਜ਼ ਦੀਆਂ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ, ਪਰ ਸੰਬੰਧਤ ਬਿਲਡਿੰਗ ਵਿਭਾਗ ਦੀ ਚੁੱਪੀ ਕਈ ਗੰਭੀਰ ਸਵਾਲ ਖੜ੍ਹੇ ਕਰ ਰਹੀ ਹੈ।

ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੰਨੀ ਵੱਡੀ ਪੱਧਰ ’ਤੇ ਚੱਲ ਰਹੀ ਨਜਾਇਜ਼ ਕਲੋਨੀ ਦੀ ਤਿਆਰੀ ਦੇ ਬਾਵਜੂਦ ਨਾ ਤਾਂ ਕਿਸੇ ਅਧਿਕਾਰੀ ਵੱਲੋਂ ਮੌਕੇ ਦੀ ਜਾਂਚ ਕੀਤੀ ਗਈ ਹੈ ਅਤੇ ਨਾ ਹੀ ਕੋਈ ਰੋਕ ਲਗਾਈ ਗਈ ਹੈ। ਇਸ ਨਾਲ ਇਹ ਸ਼ੱਕ ਪੈਦਾ ਹੋ ਰਿਹਾ ਹੈ ਕਿ ਕਿਤੇ ਇਸ ਗੈਰਕਾਨੂੰਨੀ ਕੰਮ ਨੂੰ ਕਿਸੇ ਪ੍ਰਭਾਵਸ਼ਾਲੀ ਛਤਰਛਾਇਆ ਹੇਠ ਤਾਂ ਅੰਜਾਮ ਨਹੀਂ ਦਿੱਤਾ ਜਾ ਰਿਹਾ।

ਸਰਕਾਰੀ ਨਿਯਮਾਂ ਦੇ ਉਲਟ ਕੱਟੀ ਜਾ ਰਹੀ ਇਸ ਨਜਾਇਜ਼ ਕਲੋਨੀ ਕਾਰਨ ਸਰਕਾਰ ਨੂੰ ਲੱਖਾਂ ਰੁਪਏ ਦੇ ਰੈਵੀਨਿਊ ਦਾ ਨੁਕਸਾਨ ਹੋ ਰਿਹਾ ਹੈ। ਬਿਨਾਂ ਮਨਜ਼ੂਰੀ ਕਲੋਨੀਆਂ ਕੱਟਣ ਨਾਲ ਨਾ ਤਾਂ ਸਰਕਾਰੀ ਫੀਸ ਜਮ੍ਹਾਂ ਹੋ ਰਹੀ ਹੈ ਅਤੇ ਨਾ ਹੀ ਨਿਯਮਾਂ ਅਨੁਸਾਰ ਬੁਨਿਆਦੀ ਸੁਵਿਧਾਵਾਂ ਦੀ ਯੋਜਨਾ ਬਣਾਈ ਜਾ ਰਹੀ ਹੈ, ਜਿਸ ਨਾਲ ਭਵਿੱਖ ਵਿੱਚ ਇਲਾਕਾ ਨਿਵਾਸੀਆਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਕੀ ਬਿਲਡਿੰਗ ਵਿਭਾਗ ਨੂੰ ਇਸ ਨਜਾਇਜ਼ ਕਲੋਨੀ ਬਾਰੇ ਕੋਈ ਜਾਣਕਾਰੀ ਨਹੀਂ ਜਾਂ ਫਿਰ ਜਾਣਬੁੱਝ ਕੇ ਅੱਖਾਂ ਮੂੰਦੀਆਂ ਜਾ ਰਹੀਆਂ ਹਨ? ਜੇ ਸਮੇਂ ਸਿਰ ਕਾਰਵਾਈ ਨਾ ਕੀਤੀ ਗਈ ਤਾਂ ਇਹ ਨਜਾਇਜ਼ ਕਲੋਨੀ ਪੂਰੀ ਤਰ੍ਹਾਂ ਤਿਆਰ ਹੋ ਜਾਵੇਗੀ ਅਤੇ ਬਾਅਦ ਵਿੱਚ ਕਾਰਵਾਈ ਸਿਰਫ ਕਾਗਜ਼ਾਂ ਤੱਕ ਹੀ ਸੀਮਿਤ ਰਹਿ ਜਾਵੇਗੀ।

Time TV Punjab ਜਲੰਧਰ ਪ੍ਰਸ਼ਾਸਨ ਤੋਂ ਸਵਾਲ ਕਰਦਾ ਹੈ ਕਿ ਆਖਿਰ ਕਿਹੜੀ ਤਾਕਤ ਦੇ ਭਰੋਸੇ ਇਹ ਨਜਾਇਜ਼ ਕਲੋਨੀ ਕੱਟੀ ਜਾ ਰਹੀ ਹੈ ਅਤੇ ਇਸ ਦੇ ਖਿਲਾਫ ਤੁਰੰਤ ਕਾਰਵਾਈ ਕਦੋਂ ਕੀਤੀ ਜਾਵੇਗੀ?