ਜਲੰਧਰ (ਸੁਮਿਤ ਕੁਮਾਰ) :- ਜਲੰਧਰ ‘ਚ ਅੱਜ ਧਾਰਮਿਕ ਭਾਵਨਾਵਾਂ ਨਾਲ ਜੁੜੇ ਇਕ ਮਾਮਲੇ ਨੇ ਤਪਦਾ ਰੂਪ ਧਾਰ ਲਿਆ, ਜਿੱਥੇ ਸ਼ਿਵ ਸੈਨਾ ਸਮਾਜਵਾਦੀ ਅਤੇ ਸ਼ਿਵ ਸੈਨਾ ਲਾਇਨ ਆਮਨੇ-ਸਾਮਨੇ ਆ ਗਈਆਂ। ਮਾਮਲਾ ਇਨਾ ਭਖਿਆ ਕਿ ਦੋਵੇਂ ਧਿਰਾਂ ਪੁਲਿਸ ਕਮਿਸ਼ਨਰ ਦਫ਼ਤਰ ਤੱਕ ਪਹੁੰਚ ਗਈਆਂ ਅਤੇ ਮੀਡੀਆ ਦੇ ਸਾਹਮਣੇ ਇਕ-ਦੂਜੇ ‘ਤੇ ਖੁੱਲ੍ਹੇਆਮ ਤਿੱਖੇ ਦੋਸ਼ ਲਗਾਏ।
ਵਿਵਾਦ ਦੀ ਜੜ੍ਹ ਇਕ ਮੰਦਰ ‘ਚ ਬਣੀ ਵੀਡੀਓ ਹੈ, ਜਿਸ ‘ਚ ਸ਼ਿਵ ਸੈਨਾ ਲਾਇਨ ਦੇ ਪ੍ਰਧਾਨ ਸੁਨੀਲ ਕੁਮਾਰ ਬੰਟੀ ਉੱਤੇ ਬੂਟ ਪਾ ਕੇ ਅੰਦਰ ਜਾਣ ਦੇ ਦੋਸ਼ ਲਗਾਏ ਗਏ। ਇਸ ‘ਤੇ ਬੰਟੀ ਦਾ ਸਪਸ਼ਟ ਕਹਿਣਾ ਹੈ ਕਿ ਜਿਸ ਥਾਂ ਤੋਂ ਉਹ ਬੂਟ ਪਾ ਕੇ ਬਾਹਰ ਆਏ, ਉਹੀ ਜਗ੍ਹਾ ਮੰਦਰ ਪ੍ਰਬੰਧਕਾਂ ਵੱਲੋਂ ਚੱਪਲਾਂ-ਬੂਟ ਉਤਾਰਨ ਅਤੇ ਪਹਿਨਣ ਲਈ ਨਿਰਧਾਰਿਤ ਸੀ ਅਤੇ ਉੱਥੇ ਹੋਰ ਵੀ ਕਈ ਲੋਕ ਆਪਣੇ ਬੂਟ ਪਾ ਰਹੇ ਸਨ।
ਬੰਟੀ ਨੇ ਦੋਸ਼ ਲਗਾਇਆ ਕਿ ਇਹ ਵੀਡੀਓ ਜਾਣ-ਬੁੱਝ ਕੇ ਸਾਜ਼ਿਸ਼ ਤਹਿਤ ਬਣਾਈ ਗਈ ਅਤੇ ਇਕ ਮਹਿਲਾ ਵੱਲੋਂ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਕਰਕੇ ਉਨ੍ਹਾਂ ਦੀ ਛਵੀ ਨੂੰ ਖਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ।
ਹੋਰ ਹੈਰਾਨੀਜਨਕ ਗੱਲ ਇਹ ਵੀ ਸਾਹਮਣੇ ਆਈ ਕਿ ਜਿਨ੍ਹਾਂ ਵੱਲੋਂ ਬੰਟੀ ‘ਤੇ ਉੰਗਲ ਉਠਾਈ ਜਾ ਰਹੀ ਹੈ, ਉਨ੍ਹਾਂ ਵਿੱਚੋਂ ਇਕ ਮਹਿਲਾ ਖੁਦ ਪਹਿਲਾਂ ਮੰਦਰ ਦੇ ਅੰਦਰ ਚੱਪਲਾਂ ਪਾ ਕੇ “ਚਿਕਨੀ ਚਮੇਲੀ” ਗਾਣੇ ‘ਤੇ ਡਾਂਸ ਕਰਦੀ ਵੀਡੀਓ ‘ਚ ਦਿਖਾਈ ਦਿੱਤੀ ਸੀ। ਇਸ ਮਾਮਲੇ ‘ਚ ਬੰਟੀ ਨੇ ਪਹਿਲਾਂ ਕਾਰਵਾਈ ਦੀ ਮੰਗ ਕੀਤੀ ਸੀ, ਪਰ ਪੁਲਿਸ ਦੇ ਕਹਿਣ ‘ਤੇ ਸ਼ਿਕਾਇਤ ਅੱਗੇ ਨਹੀਂ ਵਧਾਈ ਗਈ।
ਅੱਜ ਦੇ ਤਾਜ਼ਾ ਘਟਨਾ-ਚੱਕਰ ਦੌਰਾਨ ਮਾਮਲਾ ਹੋਰ ਵੀ ਗੰਭੀਰ ਹੋ ਗਿਆ ਜਦੋਂ ਦੋਨੋਂ ਧਿਰਾਂ ਵਿਚਕਾਰ ਤਕਰਾਰ ਦੌਰਾਨ ਜਾਤੀ ਸੂਚਕ ਸ਼ਬਦਾਵਲੀ ਵਰਤਣ ਦੇ ਦੋਸ਼ ਵੀ ਲੱਗੇ, ਜਿਸ ਨਾਲ ਮਾਹੌਲ ਹੋਰ ਭੜਕ ਗਿਆ।
ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਸ਼ਿਵ ਸੈਨਾ ਲਾਇਨ ਦੇ ਪ੍ਰਧਾਨ ਅਮਿਤ ਅਰੋੜਾ (ਸ਼ੇਰ) ਖੁਦ ਜਲੰਧਰ ਪਹੁੰਚੇ। ਉਨ੍ਹਾਂ ਨੇ ਸਖ਼ਤ ਰਵੱਈਆ ਅਪਣਾਉਂਦੇ ਕਿਹਾ ਕਿ ਇਹ ਸਾਰਾ ਮਾਮਲਾ ਇੱਕ ਸੋਚੀ-ਸਮਝੀ ਸਾਜ਼ਿਸ਼ ਹੈ ਅਤੇ ਇਸ ‘ਚ ਸ਼ਾਮਲ ਲੋਕਾਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ।
ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਮੰਗ ਕੀਤੀ ਕਿ ਪੁਰਾਣੇ ਮਾਮਲੇ, ਜਿਸ ‘ਚ ਮੰਦਰ ਅੰਦਰ ਚੱਪਲਾਂ ਪਾ ਕੇ ਡਾਂਸ ਕਰਨ ਵਾਲੀ ਮਹਿਲਾ ਖ਼ਿਲਾਫ਼ ਸ਼ਿਕਾਇਤ ਕੀਤੀ ਗਈ ਸੀ, ਉਸ ਨੂੰ ਦੁਬਾਰਾ ਖੋਲ੍ਹਿਆ ਜਾਵੇ।
ਫਿਲਹਾਲ ਦੋਨੋਂ ਧਿਰਾਂ ਵੱਲੋਂ ਪੁਲਿਸ ਕਮਿਸ਼ਨਰ ਕੋਲ ਸ਼ਿਕਾਇਤਾਂ ਦਰਜ ਕਰਵਾ ਦਿੱਤੀਆਂ ਗਈਆਂ ਹਨ ਅਤੇ ਪੁਲਿਸ ਪੂਰੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।
ਜਲੰਧਰ ‘ਚ ਇਹ ਟਕਰਾਅ ਹੁਣ ਸਿਰਫ਼ ਇਕ ਵੀਡੀਓ ਤੱਕ ਸੀਮਿਤ ਨਹੀਂ ਰਿਹਾ, ਸਗੋਂ ਧਾਰਮਿਕ ਮਰਿਆਦਾ, ਸਾਜ਼ਿਸ਼ ਅਤੇ ਇਜ਼ਤ ਦੇ ਸਵਾਲਾਂ ‘ਚ ਤਬਦੀਲ ਹੋ ਗਿਆ ਹੈ — ਜਿਸਦਾ ਅੰਤ ਹੁਣ ਕਾਨੂੰਨੀ ਕਾਰਵਾਈ ਹੀ ਤੈਅ ਕਰੇਗੀ।
*ਸੁਨੀਲ ਬੰਟੀ ਨੂੰ ਫਸਾਉਣ ਲਈ ਰਚੀ ਗਈ ਸਾਜ਼ਿਸ਼ : ਲਲਿਤ ਕੁਮਾਰ ਬੱਬੂ*
ਜਲੰਧਰ ਦੇ ਚਰਚਿਤ ਮੰਦਰ ਵਿਵਾਦ ਮਾਮਲੇ ‘ਚ ਸਮਾਜ ਸੇਵੀ ਲਲਿਤ ਕੁਮਾਰ ਬੱਬੂ ਨੇ ਵੀ ਆਪਣਾ ਤਿੱਖਾ ਬਿਆਨ ਜਾਰੀ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਸੁਨੀਲ ਕੁਮਾਰ ਬੰਟੀ ਦੀ ਜੋ ਵੀਡੀਓ ਵਾਇਰਲ ਕੀਤੀ ਗਈ ਹੈ, ਉਹ ਸਾਫ਼ ਤੌਰ ‘ਤੇ ਇੱਕ ਸੋਚੀ-ਸਮਝੀ ਸਾਜ਼ਿਸ਼ ਦਾ ਹਿੱਸਾ ਲੱਗਦੀ ਹੈ।
ਲਲਿਤ ਕੁਮਾਰ ਬੱਬੂ ਨੇ ਦਾਅਵਾ ਕੀਤਾ ਕਿ ਬੰਟੀ ਦੀ ਕੋਈ ਵੀ ਮੰਸ਼ਾ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦੀ ਨਹੀਂ ਸੀ। ਉਹਨਾਂ ਨੇ ਕਿਹਾ ਕਿ ਜਿਸ ਜਗ੍ਹਾ ਤੋਂ ਬੰਟੀ ਨੇ ਬੂਟ ਪਾਏ, ਉਹ ਥਾਂ ਮੰਦਰ ਪ੍ਰਬੰਧਕਾਂ ਵੱਲੋਂ ਹੀ ਚੱਪਲਾਂ ਅਤੇ ਬੂਟ ਉਤਾਰਨ-ਪਹਿਨਣ ਲਈ ਨਿਰਧਾਰਿਤ ਕੀਤੀ ਗਈ ਸੀ, ਪਰ ਇਸ ਗੱਲ ਨੂੰ ਨਜ਼ਰਅੰਦਾਜ਼ ਕਰਕੇ ਮਾਮਲੇ ਨੂੰ ਤਰੋੜ-ਮਰੋੜ ਕੇ ਪੇਸ਼ ਕੀਤਾ ਗਿਆ।
ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਵੀਡੀਓ ਨੂੰ ਜਾਣ-ਬੁੱਝ ਕੇ ਇਸ ਤਰੀਕੇ ਨਾਲ ਵਾਇਰਲ ਕੀਤਾ ਗਿਆ ਤਾਂ ਜੋ ਬੰਟੀ ਦੀ ਛਵੀ ਨੂੰ ਖਰਾਬ ਕੀਤਾ ਜਾ ਸਕੇ ਅਤੇ ਬੇਵਜ੍ਹਾ ਵਿਵਾਦ ਖੜ੍ਹਾ ਕੀਤਾ ਜਾਵੇ।
ਅੰਤ ਵਿੱਚ ਲਲਿਤ ਕੁਮਾਰ ਬੱਬੂ ਨੇ ਮਾਨਯੋਗ ਪੁਲਿਸ ਕਮਿਸ਼ਨਰ ਜਲੰਧਰ ਕੋਲ ਮੰਗ ਕੀਤੀ ਕਿ ਇਸ ਮਾਮਲੇ ਦੀ ਪੂਰੀ ਅਤੇ ਨਿਰਪੱਖ ਜਾਂਚ ਕੀਤੀ ਜਾਵੇ ਅਤੇ ਜਾਂਚ ਦੇ ਨਤੀਜਿਆਂ ਦੇ ਆਧਾਰ ‘ਤੇ ਹੀ ਅਗਲੀ ਕਾਰਵਾਈ ਕੀਤੀ ਜਾਵੇ, ਤਾਂ ਜੋ ਸੱਚ ਸਾਹਮਣੇ ਆ ਸਕੇ ਅਤੇ ਕਿਸੇ ਨਾਲ ਨਾਇਨਸਾਫੀ ਨਾ ਹੋਵੇ।
