🔴 ਆਟੋ ਬਣਿਆ “ਵੀਵੀਆਈਪੀ”! ਨੀਲੀ-ਲਾਲ ਬੱਤੀ ਨਾਲ ਪੁਲਿਸ ਨਾਕੇ ਅੱਗੇ ਹੀ ਘੁੰਮਦਾ ਰਿਹਾ, ਕਾਰਵਾਈ ਗਾਇਬ

🟥 Time TV Punjab Exclusive | ਜਲੰਧਰ

ਜਲੰਧਰ ਦੇ ਨਕੋਦਰ ਰੋਡ ‘ਤੇ ਕਾਨੂੰਨ ਦੀ ਧੱਜੀਆਂ ਉਡਾਉਂਦੀ ਇੱਕ ਹੈਰਾਨੀਜਨਕ ਤਸਵੀਰ ਸਾਹਮਣੇ ਆਈ ਹੈ, ਜਿੱਥੇ ਇੱਕ ਆਮ ਆਟੋ ਚਾਲਕ ਨੇ ਆਪਣੀ ਆਟੋ ਦੇ ਪਿੱਛੇ ਨੀਲੀ ਅਤੇ ਲਾਲ ਬੱਤੀ ਲਗਾ ਕੇ ਖੁਦ ਨੂੰ ਕਿਸੇ ਵੀਵੀਆਈਪੀ ਤੋਂ ਘੱਟ ਨਹੀਂ ਦਿਖਾਇਆ। ਇਹ ਉਹੀ ਨੀਲੀ-ਲਾਲ ਬੱਤੀਆਂ ਹਨ ਜੋ ਸਿਰਫ਼ ਪੁਲਿਸ, ਐਮਰਜੈਂਸੀ ਸੇਵਾਵਾਂ ਜਾਂ ਉੱਚ ਅਧਿਕਾਰੀਆਂ ਦੇ ਵਾਹਨਾਂ ਲਈ ਹੀ ਮਨਜ਼ੂਰ ਹੁੰਦੀਆਂ ਹਨ, ਪਰ ਹੁਣ ਇਹਨਾਂ ਦਾ ਗਲਤ ਇਸਤੇਮਾਲ ਸ਼ਰੇਆਮ ਹੋ ਰਿਹਾ ਹੈ।

ਸਭ ਤੋਂ ਵੱਡੀ ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਹ ਆਟੋ ਸਤਿਗੁਰੂ ਕਬੀਰ ਚੌਂਕ (ਵਡਾਲਾ ਚੌਂਕ) ਦੇ ਇਲਾਕੇ ਵਿੱਚ ਦਿਨ ਵਿੱਚ ਕਈ ਵਾਰ ਘੁੰਮਦੀ ਦਿਖਾਈ ਦਿੰਦੀ ਹੈ, ਜਿੱਥੇ ਥਾਣਾ ਭਾਰਗੋ ਕੈਂਪ ਦੀ ਪੁਲਿਸ ਵੱਲੋਂ ਨਿਯਮਿਤ ਤੌਰ ‘ਤੇ ਨਾਕਾਬੰਦੀ ਵੀ ਕੀਤੀ ਜਾਂਦੀ ਹੈ। ਪਰ ਇਸਦੇ ਬਾਵਜੂਦ ਨਾ ਤਾਂ ਕਿਸੇ ਪੁਲਿਸ ਕਰਮਚਾਰੀ ਨੇ ਇਸ ਆਟੋ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਅਤੇ ਨਾ ਹੀ ਕੋਈ ਕਾਰਵਾਈ ਕੀਤੀ ਗਈ।

ਸਵਾਲ ਇਹ ਖੜਾ ਹੁੰਦਾ ਹੈ ਕਿ ਜਦੋਂ ਪੁਲਿਸ ਦੇ ਨਾਕੇ ਦੇ ਸਾਹਮਣੇ ਹੀ ਇੱਕ ਆਟੋ ਚਾਲਕ ਕਾਨੂੰਨ ਦੀ ਉਲੰਘਣਾ ਕਰਦਾ ਹੋਇਆ ਨੀਲੀ-ਲਾਲ ਬੱਤੀ ਲਗਾ ਕੇ ਘੁੰਮ ਸਕਦਾ ਹੈ, ਤਾਂ ਫਿਰ ਆਮ ਲੋਕਾਂ ਲਈ ਕਾਨੂੰਨ ਦੀ ਪਾਲਣਾ ਕਿਵੇਂ ਯਕੀਨੀ ਬਣਾਈ ਜਾਵੇਗੀ? ਕੀ ਇਹ ਪੁਲਿਸ ਦੀ ਲਾਪਰਵਾਹੀ ਹੈ ਜਾਂ ਫਿਰ ਕਿਸੇ ਦੀ ਛਤਰਛਾਇਆ ਹੇਠ ਇਹ ਗੈਰਕਾਨੂੰਨੀ ਕੰਮ ਚੱਲ ਰਿਹਾ ਹੈ?

ਸ਼ਹਿਰ ਵਾਸੀਆਂ ਦਾ ਕਹਿਣਾ ਹੈ ਕਿ ਜੇਕਰ ਇਸ ਤਰ੍ਹਾਂ ਹਰ ਕੋਈ ਆਪਣੀ ਗੱਡੀ ਉੱਤੇ ਨੀਲੀ-ਲਾਲ ਬੱਤੀ ਲਗਾ ਕੇ ਘੁੰਮਣ ਲੱਗ ਪਿਆ ਤਾਂ ਕਾਨੂੰਨ ਦੀ ਗੰਭੀਰਤਾ ਖਤਮ ਹੋ ਜਾਵੇਗੀ ਅਤੇ ਅਸਲੀ ਐਮਰਜੈਂਸੀ ਵਾਹਨਾਂ ਦੀ ਪਹਿਚਾਣ ਕਰਨਾ ਵੀ ਮੁਸ਼ਕਿਲ ਹੋ ਜਾਵੇਗਾ।

ਹੁਣ ਦੇਖਣਾ ਇਹ ਹੋਵੇਗਾ ਕਿ ਜਲੰਧਰ ਪੁਲਿਸ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੀ ਹੈ ਜਾਂ ਫਿਰ ਇਹ “ਨਕਲੀ ਵੀਵੀਆਈਪੀ ਕਲਚਰ” ਸ਼ਹਿਰ ਦੀਆਂ ਸੜਕਾਂ ‘ਤੇ ਇਉਂ ਹੀ ਚਲਦਾ ਰਹੇਗਾ।