🌳 ਮਾਡਲ ਟਾਊਨ ‘ਚ ਰਾਤੋਂ-ਰਾਤ ਕੱਟਿਆ ਗਿਆ ਵਿਰਾਸਤੀ ਦਰੱਖਤ, ਲੋਕਾਂ ‘ਚ ਰੋਸ

ਜਲੰਧਰ : ਮਾਡਲ ਟਾਊਨ ਇਲਾਕੇ ਵਿੱਚ ਕਥਿਤ ਗੈਰਕਾਨੂੰਨੀ ਦਰੱਖਤ ਕੱਟਣ ਦਾ ਇੱਕ ਹੋਰ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ। ਮਸੰਦ ਚੌਕ ਨੇੜੇ ਸਥਿਤ ਇੱਕ ਪੁਰਾਣਾ ਤੇ ਵਿਰਾਸਤੀ ਸ਼੍ਰੇਣੀ ਦਾ ਹਰਾ-ਭਰਾ ਦਰੱਖਤ ਤੜਕੇ ਗੁਪਤ ਤਰੀਕੇ ਨਾਲ ਕੱਟ ਦਿੱਤਾ ਗਿਆ। ਮੌਕੇ ‘ਤੇ ਹੁਣ ਸਿਰਫ਼ ਉਸ ਦਾ ਠੂਠ ਹੀ ਬਚਿਆ ਹੈ, ਜਿਸ ਕਾਰਨ ਸਥਾਨਕ ਵਸਨੀਕਾਂ ਵਿੱਚ ਭਾਰੀ ਨਾਰਾਜ਼ਗੀ ਪਾਈ ਜਾ ਰਹੀ ਹੈ।
ਸਥਾਨਕ ਲੋਕਾਂ ਅਤੇ ਮੌਕੇ ‘ਤੇ ਮੌਜੂਦ ਕਰਮਚਾਰੀਆਂ ਦੇ ਅਨੁਸਾਰ ਇਹ ਕਾਰਵਾਈ ਰਾਤ ਕਰੀਬ 2 ਵਜੇ ਸ਼ੁਰੂ ਹੋਈ ਅਤੇ ਸਵੇਰੇ ਲਗਭਗ 6 ਵਜੇ ਤੱਕ ਜਾਰੀ ਰਹੀ। ਦਰੱਖਤ ਨੂੰ ਕੱਟਣ ਅਤੇ ਹਟਾਉਣ ਲਈ ਜੇ.ਸੀ.ਬੀ. ਮਸ਼ੀਨਾਂ ਅਤੇ ਟ੍ਰਾਲੀਆਂ ਦੀ ਵਰਤੋਂ ਕੀਤੀ ਗਈ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਇਸ ਦੌਰਾਨ ਨਾ ਕੋਈ ਪੀ.ਸੀ.ਆਰ. ਟੀਮ ਅਤੇ ਨਾ ਹੀ ਪੁਲਿਸ ਦਾ ਕੋਈ ਜਵਾਨ ਮੌਕੇ ‘ਤੇ ਪਹੁੰਚਿਆ।
ਇਸ ਮਾਮਲੇ ਸਬੰਧੀ ਸਮਾਜਿਕ ਕਾਰਕੁੰਨ ਤੇਜਸਵੀ ਮਿੰਹਾਸ ਵੱਲੋਂ ਅਧਿਕਾਰਿਕ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ। ਉਨ੍ਹਾਂ ਇਸ ਘਟਨਾ ਨੂੰ
“ਕੁਦਰਤੀ ਵਿਰਾਸਤ ਦਾ ਸੁਚਿੰਤਿਤ ਨਾਸ” ਕਰਾਰ ਦਿੰਦਿਆਂ ਕਿਹਾ ਕਿ ਸ਼ਹਿਰ ਦੇ ਹਰੇ-ਭਰੇ ਦਰੱਖਤਾਂ ਨੂੰ ਵਪਾਰਕ ਲਾਭ ਲਈ ਕੁਰਬਾਨ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਦੱਸਿਆ ਕਿ ਇਹ ਥਾਂ ਮਾਡਲ ਟਾਊਨ ਗੁਰਦੁਆਰੇ ਤੋਂ 50 ਮੀਟਰ ਤੋਂ ਵੀ ਘੱਟ ਦੂਰੀ ‘ਤੇ ਹੈ, ਜਿੱਥੇ ਕੁਝ ਦਿਨ ਪਹਿਲਾਂ ਆਮ ਆਦਮੀ ਪਾਰਟੀ ਦੇ ਨੇਤਾ ਲੱਕੀ ਓਬਰਾਏ ਦੀ ਗੋਲੀ ਮਾਰ ਕੇ ਹੱਤਿਆ ਹੋਈ ਸੀ ਅਤੇ ਇਸ ਤੋਂ ਬਾਅਦ ਇਲਾਕਾ ਵਿਸ਼ੇਸ਼ ਨਿਗਰਾਨੀ ਹੇਠ ਦੱਸਿਆ ਜਾ ਰਿਹਾ ਸੀ। ਇਸ ਦੇ ਬਾਵਜੂਦ ਇੰਨੀ ਵੱਡੀ ਕਾਰਵਾਈ ਰਾਤ ਦੇ ਸਮੇਂ ਹੋ ਜਾਣਾ ਪ੍ਰਸ਼ਾਸਨਕ ਪ੍ਰਬੰਧਾਂ ‘ਤੇ ਸਵਾਲ ਖੜੇ ਕਰਦਾ ਹੈ।
ਤੇਜਸਵੀ ਮਿੰਹਾਸ ਨੇ ਦੋਸ਼ ਲਗਾਇਆ ਕਿ ਵਪਾਰਕ ਸਥਾਨਾਂ ਦੀ ਦਿੱਖ ਅਤੇ ਪਹੁੰਚ ਵਧਾਉਣ ਲਈ ਦਰੱਖਤ ਨੂੰ ਜਾਣ-ਬੁੱਝ ਕੇ ਕੱਟਿਆ ਗਿਆ। ਉਨ੍ਹਾਂ ਕਿਹਾ ਕਿ ਇਹ ਕਾਰਵਾਈ
ਭਾਰਤੀ ਨਿਆਂ ਸੰਹਿਤਾ ਦੇ ਪ੍ਰਾਵਧਾਨਾਂ, ਪੰਜਾਬ ਟ੍ਰੀਜ਼ ਪ੍ਰਿਜ਼ਰਵੇਸ਼ਨ ਪਾਲਿਸੀ–2024 ਅਤੇ ਪੰਜਾਬ ਪ੍ਰੋਟੈਕਸ਼ਨ ਆਫ ਟ੍ਰੀਜ਼ ਐਕਟ–2025 ਦੀ ਸਪਸ਼ਟ ਉਲੰਘਣਾ ਹੈ।
ਉਨ੍ਹਾਂ ਜ਼ਿਲ੍ਹਾ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਦੋਸ਼ੀਆਂ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ ਅਤੇ ਉਸੇ ਥਾਂ ‘ਤੇ ਤੁਰੰਤ ਪ੍ਰਤਿਪੂਰਕ ਪੌਧਾਰੋਪਣ ਕਰਵਾ ਕੇ ਪਰਿਆਵਰਣ ਨੂੰ ਹੋਏ ਨੁਕਸਾਨ ਦੀ ਭਰਪਾਈ ਕੀਤੀ ਜਾਵੇ।