Deputy Commissioner Office Jalandhar ਦੇ ਬਾਹਰ ਮੇਨ ਗੇਟ ਨੰਬਰ-4 ਦੀ ਪਹਿਚਾਣ ਪਿਛਲੇ ਕਈ ਸਾਲਾਂ ਤੋਂ ਲਗਭਗ ਗਾਇਬ ਹੋ ਚੁੱਕੀ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਗੇਟ ਦੇ ਉੱਪਰ ਯੂ-ਸ਼ੇਪ ਵਿੱਚ ਲੱਗਿਆ ਸਰਕਾਰੀ ਬੋਰਡ ਕਾਫੀ ਸਮੇਂ ਤੋਂ ਟੁੱਟਿਆ ਹੋਇਆ ਪਿਆ ਹੈ, ਪਰ ਇਸ ਨੂੰ ਅਜੇ ਤੱਕ ਠੀਕ ਕਰਨ ਵੱਲ ਕਿਸੇ ਵੀ ਅਧਿਕਾਰੀ ਦਾ ਧਿਆਨ ਨਹੀਂ ਗਿਆ।
ਸਥਾਨਕ ਲੋਕਾਂ ਦੇ ਅਨੁਸਾਰ ਗੇਟ ਨੰਬਰ-4 ਉੱਤੇ ਲੱਗਿਆ ਬੋਰਡ ਕਈ ਸਾਲ ਪਹਿਲਾਂ ਟੁੱਟ ਗਿਆ ਸੀ ਅਤੇ ਉਸ ਤੋਂ ਬਾਅਦ ਨਾ ਤਾਂ ਉਸ ਦੀ ਮੁਰੰਮਤ ਹੋਈ ਅਤੇ ਨਾ ਹੀ ਨਵਾਂ ਬੋਰਡ ਲਗਾਇਆ ਗਿਆ। ਇਸ ਕਾਰਨ ਆਮ ਲੋਕਾਂ ਨੂੰ ਇਹ ਵੀ ਪਤਾ ਨਹੀਂ ਲੱਗਦਾ ਕਿ ਇਹ ਕਿਹੜਾ ਗੇਟ ਹੈ, ਜਦਕਿ ਡਿਪਟੀ ਕਮਿਸ਼ਨਰ ਦਫ਼ਤਰ ਵਿੱਚ ਆਉਣ ਵਾਲੀ ਆਮ ਪਬਲਿਕ ਲਈ ਇਹ ਮੁੱਖ ਦਾਖਲਾ ਦਰਵਾਜ਼ਿਆਂ ਵਿੱਚੋਂ ਇੱਕ ਹੈ। 
ਹੋਰ ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਸੇ ਇਲਾਕੇ ਦੇ ਸਾਹਮਣੇ ਹੀ ਸਬ ਡਿਵੀਜ਼ਨਲ ਮਜਿਸਟਰੇਟ ਜਲੰਧਰ-1 ਅਤੇ ਉਪ ਮੰਡਲ ਮਜਿਸਟਰੇਟ ਜਲੰਧਰ-2 ਦੇ ਦਫ਼ਤਰ ਵੀ ਸਥਿਤ ਹਨ। ਇਸ ਦੇ ਬਾਵਜੂਦ ਵੀ ਕਿਸੇ ਵੀ ਸਰਕਾਰੀ ਅਧਿਕਾਰੀ ਵੱਲੋਂ ਇਸ ਟੁੱਟੇ ਹੋਏ ਬੋਰਡ ਅਤੇ ਗੇਟ ਦੀ ਪਹਿਚਾਣ ਨੂੰ ਠੀਕ ਕਰਨ ਲਈ ਕੋਈ ਕਦਮ ਨਹੀਂ ਚੁੱਕਿਆ ਗਿਆ।
ਗੇਟ ਨੰਬਰ-4 ਦੀ ਮੌਜੂਦਾ ਹਾਲਤ ਸਰਕਾਰੀ ਲਾਪਰਵਾਹੀ ਨੂੰ ਸਾਫ਼ ਦਰਸਾਉਂਦੀ ਹੈ। ਇੱਕ ਪਾਸੇ ਜਿੱਥੇ ਸਰਕਾਰੀ ਦਫ਼ਤਰਾਂ ਵਿੱਚ ਆਉਣ ਵਾਲੇ ਲੋਕਾਂ ਲਈ ਸਹੂਲਤਾਂ ਦੀ ਗੱਲ ਕੀਤੀ ਜਾਂਦੀ ਹੈ, ਉੱਥੇ ਹੀ ਦੂਜੇ ਪਾਸੇ ਇਨ੍ਹਾਂ ਜਿਹੀਆਂ ਛੋਟੀਆਂ ਪਰ ਮਹੱਤਵਪੂਰਨ ਚੀਜ਼ਾਂ ਵੱਲ ਧਿਆਨ ਨਾ ਦੇਣਾ ਸਵਾਲ ਖੜੇ ਕਰਦਾ ਹੈ।
ਸਥਾਨਕ ਲੋਕਾਂ ਅਤੇ ਦਫ਼ਤਰ ਆਉਣ ਵਾਲੀ ਪਬਲਿਕ ਨੇ ਮੰਗ ਕੀਤੀ ਹੈ ਕਿ ਪ੍ਰਸ਼ਾਸਨ ਤੁਰੰਤ ਗੇਟ ਨੰਬਰ-4 ਉੱਪਰ ਨਵਾਂ ਬੋਰਡ ਲਗਾ ਕੇ ਇਸ ਦੀ ਪਹਿਚਾਣ ਮੁੜ ਸਥਾਪਿਤ ਕਰੇ ਤਾਂ ਜੋ ਲੋਕਾਂ ਨੂੰ ਆਉਣ-ਜਾਣ ਵਿੱਚ ਕੋਈ ਦਿੱਕਤ ਨਾ ਆਵੇ।
